udupibits

ಉಡುಪಿ: ಉಡುಪಿ- ಚಿಕ್ಕಮಗಳೂರು ಲೋಕಸಭಾ ಕ್ಷೇತ್ರಕ್ಕೆ ಮಾ.18 ರಂದು ನಡೆಯಲಿರುವ ಮರು ಚುನಾವಣೆಗೆ ಪ್ರಮುಖ ರಾಜಕೀಯ ಪಕ್ಷಗಳು ಬಿರುಸಿನ ಪ್ರಚಾರ ಕಾರ್ಯದಲ್ಲಿ ನಿರತವಾಗಿರುವಂತೆಯೇ ಕೆಲವು ಪತ್ರಿಕೆಗಳಿಗೆ ಮತ್ತು ಖಾಸಗಿ ಟಿವಿ ಛಾನೆಲ್ ಗಳಿಗೆ ಕಾಸು ಕೊಟ್ಟು ತಮ್ಮ ಪರವಾಗಿ ಸುದ್ದಿಯನ್ನು ಬರೆಸಿಕೊಳ್ಳುತ್ತಿದ್ದಾರೆಯೇ ಎಂಬ ಸಂಶಯ ವ್ಯಕ್ತವಾಗಿದೆ.
ಕೆಲವು ದಿನಪತ್ರಿಕೆಗಳಲ್ಲಿ, ವಾರ ಪತ್ರಿಕೆಗಳಲ್ಲಿ, ಕೆಲವು ಟಿವಿ ಛಾನೆಲ್ ಗಳಲ್ಲಿ ಒಂದೆರಡು ಪ್ರಮುಖ ರಾಜಕೀಯ ಪಕ್ಷಗಳ ಪರವಾದ ಸುದ್ದಿಗಳು ಈಗಾಗಲೇ ಪ್ರಕಟವಾಗಿವೆ, ಪ್ರಸಾರವಾಗಿವೆ. ಆಗುತ್ತಲೇ ಇದೆ. ಒಂದೆರಡು ವಾರ ಪತ್ರಿಕೆಗಳು ಈಗಾಗಲೇ ಯಾರು ಗೆಲ್ಲಬಹುದೆಂಬುದನ್ನು ಬಹಿರಂಗಪಡಿಸಿವೆ. ಯಾರು ಗೆಲ್ಲಬೇಕೆಂದೂ ಫರ್ಮಾನು ಹೊರಡಿಸಿವೆ. ಕೆಲವು ಖಾಸಗಿ ಟಿವಿ ಛಾನೆಲ್ ಗಳು ನ್ಯೂಸ್ ಹೆಸರಲ್ಲಿ ಅಭ್ಯರ್ಥಿಗಳ ಚುನಾವಣಾ ವೇದಿಕೆಯೂ ಆಗುತ್ತಿರುವುದನ್ನು ಸ್ಪಷ್ಪವಾಗಿವೆ. ಕಾಂಗ್ರೆಸ್ ಮತ್ತು ಬಿಜೆಪಿ ಅಭ್ಯರ್ಥಿಗಳ ಪ್ರಚಾರ ಭಾಷಣಗಳನ್ನು ಕಾಲು ಗಂಟೆ, ಅರ್ಧ ಗಂಟೆ ಕಾಲ ಪ್ರಸಾರ ಮಾಡುತ್ತಿವೆ.
ಪತ್ರಿಕೆಗಳಲ್ಲಿ ಪ್ರಕಟವಾಗುವ ಕೆಲವು ವರದಿಗಳು, ವಿಶೇಷ ವರದಿಗಳು, ಲೇಖನಗಳು, ಟಿವಿ ಛಾನೆಲ್ ಗಳಲ್ಲಿ ಪ್ರಸಾರವಾಗುವ ಸುದ್ದಿಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ ಇವುಗಳೆಲ್ಲ ಸುದ್ದಿ ರೂಪದಲ್ಲಿರುವ ಜಾಹೀರಾತುಗಳು ಎಂಬ ಸತ್ಯ ಖಚಿತವಾಗುತ್ತದೆ.
ಮಾ. 12 ರ ಉದಯವಾಣಿಯಲ್ಲಿ ‘ಶ್ರೀ ಕ್ಷೇತ್ರ ಕಚ್ಚೂರಿನ ಅಭಿವೃದ್ದಿ: ರಾಜ್ಯ ಸರಕಾರದಿಂದ 2 ಕೋ.ರೂ. ಮಿಕ್ಕಿ ಅನುದಾನ’ ಎಂಬ ಬರಹ ಪ್ರಕಟವಾಗಿದೆ. ಇದನ್ನು ವರದಿ ಎಂದು ಹೇಳಲು ಸಾಧ್ಯವಿಲ್ಲ. ವರದಿಗೆ ಬೇಕಾದ ಡೇಟ್ ಲೈನ್ ಈ ಬರಹಕ್ಕಿಲ್ಲ. ಇದನ್ನು ಲೇಖನ ಎನ್ನಬಹುದು. ಆದರೆ, ಈ ಲೇಖನ ಬರೆದವರ ಹೆಸರು ಇದರಲ್ಲಿಲ್ಲ. ಕಚ್ಚೂರು ಕ್ಷೇತ್ರದಲ್ಲಿ ಈಗ ಬ್ರಹ್ಮಕಲಶವಾಗಲೀ, ಜೀರ್ಣೋದ್ದಾರವಾಗಲೀ, ವಾರ್ಷೀಕ ಉತ್ಸವವಾಗಲೀ ಇಲ್ಲ. ಯಾವ ಕಾರ್ಯಕ್ರಮಗಳೂ ಇಲ್ಲದಿರುವಾಗ ಬಿಜೆಪಿ ಪರವಾದ, (ಲೇಖನದಲ್ಲಿ ಆನಂದ ಮಟಪಾಡಿ, ಸಮಾಜ ಸೇವಕರು ಎಂಬವರ ಅಭಿಪ್ರಾಯವನ್ನೂ ಪ್ರಕಟಿಸಲಾಗಿದೆ. ಇವರು ಬಿಜೆಪಿ ಜಿಲ್ಲಾ ಸಮಿತಿಯ ಪದಾಧಿಕಾರಿ ಎನ್ನುವುದನ್ನು ಲೇಖನದಲ್ಲಿ ಉದ್ದೇಶಪೂರ್ವಕವಾಗಿ ಮರೆಮಾಚಲಾಗಿದೆ) ಲೇಖನವನ್ನು ಚುನಾವಣಾ ಸಂದರ್ಭದಲ್ಲಿ ಪ್ರಕಟಿಸಿರುವುದು ಕಾಸಿಗಾಗಿ ಸುದ್ದಿ ಅಲ್ಲದೇ ಮತ್ತೇನು ?
ಚುನಾವಣಾ ವೀಕ್ಷಕರು ಕಳೆದ ಒಂದು ವಾರದ ಎಲ್ಲಾ ದಿನ, ವಾರ ಪತ್ರಿಕೆಗಳನ್ನು, ಖಾಸಗಿ ಟಿವಿ ಛಾನೆಲ್ ಗಳ ಎಲ್ಲಾ ಸುದ್ದಿಗಳನ್ನೂ ಸೂಕ್ಷ್ಮವಾಗಿ ಪರಿಶೀಲನೆ ಮಾಡಬೇಕಾಗಿದೆ. ಸರಕಾರಿ ಅಧಿಕಾರಿಗಳು, ಸಾರ್ವಜನಿರು ಇವುಗಳನ್ನೆಲ್ಲ ಸೂಕ್ಷ್ಮವಾಗಿ ಪರಿಶೀಲನೆ ಮಾಡಿದ್ದೇ ಆದಲ್ಲಿ ಕಾಸಿಗಾಗಿ ಸುದ್ದಿ ಪ್ರಕರಣ ಬಯಾಲಾಗಲಿದೆ. ವರದಿ: ಶ್ರೀರಾಮ ದಿವಾಣ.