ಉಡುಪಿ: ಬಿಜೆಪಿಯಿಂದ ಹಲವು ಮಂದಿ ನಾಯಕರು ದೂರ ಸರಿಯಲು ಅನಂತಕುಮಾರ್ ಕಾರಣ. ಜನಬೆಂಬಲ ಇಲ್ಲವಾದರೂ ಮುಖ್ಯಮಂತ್ರಿಯಾಗಲು ಪೇಚಾಟ ನಡೆಸುತ್ತಿದ್ದಾರೆ. ಅದಕ್ಕಾಗಿ ಮುಖ್ಯಮಂತ್ರಿಯಾದವರನ್ನು ಮುಂದಕ್ಕೆ ಆಗಬಹುದಾದವರನ್ನು ಪಕ್ಷದಲ್ಲಿ ಬದಿಗೆ ಸರಿಸುವ ಕೆಲಸ ಮಾಡುತ್ತಿದ್ದಾರೆ. ಇದುವೇ ಪಕ್ಷದ ದುರಂತಕ್ಕೂ ಕಾರಣವಾಗಿದೆ ಎಂದು ಕೆಜೆಪಿ ಪ್ರಚಾರ ಸಮಿತಿ ಅಧ್ಯಕ್ಷ, ಮಾಜಿ ಕೇಂದ್ರ ಸಚಿವ ವಿ.ಧನಂಜಯ ಕುಮಾರ್ ತಿಳಿಸಿದ್ದಾರೆ.
ಉಡುಪಿ ನಗರದ ಖಾಸಗಿ ಹೊಟೇಲ್ ಸಭಾಂಗಣದಲ್ಲಿ ಇಂದು ಕರೆದ ಮಾಧ್ಯಮಗೋಷ್ಟಿಯಲ್ಲಿ ಅವರು ಮಾತನಾಡುತ್ತಿದ್ದರು.
40 ವರ್ಷಗಳಿಂದ ಸಕ್ರಿಯ ರಾಜಕೀಯದಲ್ಲಿದ್ದೇನೆ. ಯಡಿಯೂರಪ್ಪರಂಥ ನಾಯಕರನ್ನು ಇದುವರೆಗೆ ಕಂಡಿಲ್ಲ. ಅವರ ಅವಧಿಯಲ್ಲಿ ರಾಜ್ಯ ಅಭಿವೃದ್ಧಿ ಕಂಡಿತ್ತು. ನಿರಂತರವಾಗಿ ಮೂರು ವರ್ಷಗಳ ಕಾಲವೂ ಕೇಂದ್ರ ಸರಕಾರ ರಾಜ್ಯ ಸರಕಾರಕ್ಕೆ ಪ್ರಶಸ್ತಿ ನೀಡಿತ್ತು. ಇದೀಗ ರಾಜ್ಯದಲ್ಲಿ ಅರಾಜಕತೆ ಸೃಷ್ಟಿಯಾಗಿದೆ. ಶಾಶ್ವತ ಕಾಮಗಾರಿಗಳು ನಡೆದೇ ಇಲ್ಲ. ಕುಡಿಯಲ್ಲು ನೀರು ಸಹ ಇಲ್ಲವಾಗಿದೆ. ಜನ ವಿರೋಧಿ ಸರಕಾರವನ್ನು ಮುಂದುವರಿಸುವುದರ ಬದಲು ಶೆಟ್ಟರ್ ರಾಜೀನಾಮೆ ನೀಡಬೇಕು. ಆದರೆ, ಅವರು ಕುರ್ಚಿಗಂಟಿ ಕುಳಿತಿದ್ದಾರೆ. ಪ್ರಗತಿಯಲ್ಲಿ ಇದೀಗ ರಾಜ್ಯ 16 ನೇ ಸ್ಥಾನಕ್ಕೆ ಕುಸಿದಿದೆ. ಈ ಎಲ್ಲಾ ಬೆಳವಣಿಗೆಗಳಿಂದಾಗಿ ರಾಜ್ಯದಲ್ಲಿ ತ್ವರಿತಗತಿಯಬ ಬದಲಾವಣೆಗಳು ಕಂಡು ಬರುತ್ತಿದೆ. ಮತದಾರರಲ್ಲಿ ವ್ಯಾಪಕವಾಗಿ ಯಡಿಯೂರಪ್ಪ ಪರವಾದ ಅಂಡರ್ ಕರೆಂಟ್ (ಒಳ ಹರಿವು) ಕಂಡು ಬರುತ್ತಿದೆ ಎಂದು ಧನಂಜಯ ಕುಮಾರ್ ಹೇಳಿದರು.
ಬಿಜೆಪಿಯಲ್ಲಿ ಈಗ ಒಳಜಗಳ ನಡೆಯುತ್ತಿದೆ. ನಿನ್ನೆ ನಡೆದ ಸ್ಥಳೀಯ ಸಂಸ್ಥೆಗಳ ಪೂರ್ವಭಾವೀ ಸಿದ್ಧತಾ ಸಭೆಯಲ್ಲಿ ಭಾಗವಹಿಸಿದ ಮಾಜಿ ಸಿಎಂ ಡಿ.ವಿ.ಸದಾನಂದ ಗೌಡರು ಸಭೆಗೆ ಬಹಿಷ್ಕಾರ ಹಾಕಿ ಹೊರ ನಡೆದಿದ್ದಾರೆ. ಅವರ ಸಂಬಂಧಿಗಳೆಲ್ಲ ಜೆಡಿಎಸ್ ನಲ್ಲಿದ್ದು ಗೌಡರು ಸಹ ಜೆಡಿಎಸ್ ಗೆ ಹೋದರೆ ಆಶ್ಚರ್ಯವಿಲ್ಲ. ಬಿಜೆಪಿಯ ಚುನಾವಣಾ ಪೂರ್ವಭಾವೀ ಸಭೆಯಿಂದ ಹೊರನಡೆದ ಡಿವಿ ತನ್ನ ಎಂಎಲ್ ಸಿ ಸ್ಥಾನಕ್ಕೂ ರಾಜೀನಾಮೆ ನೀಡಿದರೆಂಬ ಮಾಹಿತಿ ಇದೀಗ ಬಂದಿದೆ ಎಂದು ಮಾಜಿ ಕೇಂದ್ರ ಸಚಿವರು ಬಹಿರಂಗಪಡಿಸಿದರು.
ಕಾಂಗ್ರೆಸ್ ನಲ್ಲೂ ಒಳಜಗಳ ಕಂಡುಬರುತ್ತಿದೆ. ಮಲ್ಲಿಕಾರ್ಜುನ ಖರ್ಗೆಯವರು ಕಾಂಗ್ರೆಸ್ ಗೆಲುಗಾಗಿ ಅಲ್ಲ, ಬದಲಾಗಿ ಸಿದ್ಧರಾಮಯ್ಯರನ್ನು ಸೋಲಿಸಲು ಆರಂಭಿಸಿದ್ದಾರೆ ಎಂದು ತಿಳಿಸಿದ ಕೆಜೆಪಿ ಪ್ರಚಾರ ಸಮಿತಿ ಅಧ್ಯಕ್ಷರು, ಸ್ಥಳೀಯ ಸಂಸ್ಥೆಗಳ ಚುನಾವಣೆ ಸಂವಿಧಾನ ಬದ್ಧವಾಗಿ ಕಾಲಬದ್ಧವಾಗಿ ನಡೆಯಬೇಕು. ನಾವಿದನ್ನು ಸ್ವಾಗತಿಸುತ್ತೇವೆ. ಈ ನಿಟ್ಟಿನಲ್ಲಿ ರಾಜ್ಯಪಾಲರು ಸಂವಿಧಾನವನ್ನು ಎತ್ತಿಹಿಡಿಯುವ ಕೆಲಸ ಮಾಡಿದ್ದಾರೆ. ಚುನಾವಣಾ ಆಯೋಗವನ್ನೂ ನಾವು ಅಭಿನಂದಿಸುತ್ತೇವೆ ಎಂದು ಹೇಳಿದರು.
ಉಡುಪಿ ಜಿಲ್ಲೆಯ ಉಡುಪಿ ನಗರಸಭೆ, ಕಾರ್ಕಳ ಮತ್ತು ಕುಂದಾಪುರ ಪುರಸಭೆ ಹಾಗೂ ಸಾಲಿಗ್ರಾಮ ಪಟ್ಟಣ ಪಂಚಾಯತ್ ನ ಎಲ್ಲಾ 95 ಸ್ಥಾನಗಳಿಗೂ ಕೆಜೆಪಿ ಸ್ಪರ್ಧಿಸಲಿದೆ. ತೆಂಗಿನಕಾಯಿ ಪಕ್ಷದ ಚುನಾವಣ ಚಿಹ್ನೆಯಾಗಿದೆ. ಚುನಾವಣಾ ಪೂರ್ವಭಾವಿಯಾಗಿ ನಾಲ್ಕು ಉಸ್ತುವಾರಿ ಸಮಿತಿಗಳನ್ನು ರಚಿಸಲಾಗಿದೆ. ಉಡುಪಿ ನಗರಸಭೆಗೆ ಅಶೋಕ್ ಕುಮಾರ್ ಶೆಟ್ಟಿ, ಸುಭಾಶಿತ್ ಕುಮಾರ್, ತೇಜೇಶ್ವರ ರಾವ್, ವಿಕ್ರಂ, ಸುಬ್ರಾಯ ಪಡಿಲ್ಕರ್, ಕಾರ್ಕಳ ಪುರಸಭೆಗೆ ಚಂದ್ರಶೇಖರ ಕಾಮತ್, ಸುಧಾಕರ ಹೆಗ್ಡೆ, ಸುನಿಲ್ ಸಫಲಿಗ, ಕಿಶೋರ್ ಕುಮಾರ್, ಕುಂದಾಪುರ ಪುರಸಭೆಗೆ ಸನತ್ ಬಳಗಾರ, ಶಿರಿಯಾರ ಮುದ್ದಣ್ಣ ಶೆಟ್ಟಿ, ಸಾಲಿಗ್ರಾಮ ಪಟ್ಟಣ ಪಂಚಾಯತ್ಗೆ ವಿಜಯ ಕುಮಾರ್, ರಾಮ ಪೂಜಾರಿ, ನಾರಾಯಣ ಹೇಳರ್ೆ, ನರಸಿಂಹ ಮರಕಾಲ ಇವರನ್ನು ಉಸ್ತುವಾರಿ ಸಮಿತಿಯನ್ನು ರಚಿಸಲಾಗಿದೆ. ಫೆ.20 ರಿಂದ ನಾಮಪತ್ರ ಕೆಜೆಪಿ ಅಭ್ಯರ್ಥಿಗಳು ನಾಮಪತ್ರ ಸಲ್ಲಿಸುವರು ಎಂದು ಧನಂಜಯ ಕುಮಾರ್ ವಿವರ ನೀಡಿದರು.
ಮಾಧ್ಯಮಗೋಷ್ಟಿಯಲ್ಲಿ ಕೆಜೆಪಿ ರಾಜ್ಯ ಕಾರ್ಯದರ್ಶಿ ರಾಮಚಂದರ್ ಬೈಕಂಪಾಡಿ, ರಾಜ್ಯ ಕಾರ್ಯಕಾರಿಣಿ ಸದಸ್ಯರಾದ ಗಣೇಶ್ ಪ್ರಸಾದ್ ಶೆಟ್ಟಿ, ದಿನಕರ್ ಬೆಂಗಳೂರು, ನಾಯಕರಾದ ಶಿರಿಯಾರ ಮುದ್ಧಣ್ಣ ಶೆಟ್ಟಿ, ರಾಜ ಬಳ್ಳಾಲ್ ಕುಂದಾಪುರ, ಸುಧಾಕರ ಹೆಗ್ಡೆ ಕಾರ್ಕಳ, ವಿಜಯ ಕುಮಾರ್ ಸಾಲಿಗ್ರಾಮ, ಸುಭಾಶಿತ್ ಕುಮಾರ್ ಮೊದಲಾದವರು ಉಪಸ್ಥಿತರಿದ್ದರು.
