ಉಡುಪಿ: ಉಡುಪಿ ನಗರ ಸಭೆಯ ಮಾಜಿ ಅಧ್ಯಕ್ಷ, ಬಿಜೆಪಿಯ ಸ್ಥಳೀಯ ನಾಯಕ ಚಿತ್ತರಂಜನ್ ದಾಸ್ ಹೆಗ್ಡೆ ಬಿಜೆಪಿ ತೊರೆದು ಕಾಂಗ್ರೆಸ್ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ. ಬಿಜೆಪಿಯಲ್ಲಿನ ಹಿರಿಯ ನಾಯಕರು ಬಿಜೆಪಿ ಬಗ್ಗೆ ಎಷ್ಟೊಂದು ಭ್ರಮನಿರಸಗೊಂಡಿದ್ದಾರೆ ಎನ್ನುವುದಕ್ಕೆ ಹೆಗ್ಡೆಯವರೇ ಸಾಕ್ಷಿ ಎಂದು ಉಡುಪಿ ವಿಧನಸಭಾ ಕ್ಷೇತ್ರದ ಕಾಂಗ್ರೆಸ್ ಅಭ್ಯರ್ಥಿ ಪ್ರಮೋದ್ ಮಧ್ವರಾಜ್ ಹೇಳಿದರು.
ಉಡುಪಿ ಪ್ರೆಸ್ ಕ್ಲಬ್ ನಲ್ಲಿ ಎ.22 ರಂದು ಮಾಧ್ಯಮಗೋಷ್ಟಿಯಲ್ಲಿ, ಭವಿಷ್ಯದ ಉಡುಪಿಗೊಂದು ನೀಲ ನಕಾಶೆ ‘ವಿಷನ್ ಉಡುಪಿ- 2025′ ನ್ನು ಬಿಡುಗಡೆಗೊಳಿಸಿದ ಬಳಿಕ ಅವರು ಮಾತನಾಡುತ್ತಿದ್ದರು. ದೇಶದಲ್ಲೇ ಉಡುಪಿಯನ್ನು ಮಾದರಿ ಕ್ಷೇತ್ರವನ್ನಾಗಿ ಮಡುವುದಾಗಿ ಈ ಸಂದರ್ಭದಲ್ಲಿ ಪ್ರಮೋದ್ ಹೇಳಿದರು.
ಮಾಧ್ಯಮಗೋಷ್ಟಿಯಲ್ಲಿ ಉಪಸ್ಥಿತರಿದ್ದು ಮಾತನಾಡಿದ ಚಿತ್ತರಂಜನ್ ದಾಸ್ ಹೆಗ್ಡೆ, ತಾನು ಜನಸಂಘದ ಕಾಲದಿಂದ ಇಂದಿನ ಬಿಜೆಪಿವರೆಗೂ ಕಳೆದ 38 ವರ್ಷಗಳಿಂದಲೂ ಸಕ್ರಿಯ ಕಾರ್ಯಕರ್ತ. ಪಕ್ಷದಲ್ಲಿನ ಇತ್ತೀಚೆಗಿನ ವರ್ತನೆಗಳಿಂದ ತನಗೆ ನೋವಾಗಿದೆ. ಬಿಜೆಪಿ ಸರಕಾರ ಆಡಳಿತಕ್ಕೆ ಬಂದ ಬಳಿಕ ಭ್ರಷ್ಟಾಚಾರ ವ್ಯಾಪಕವಾಗಿದೆ. ಬಿಜೆಪಿಯಲ್ಲಿನ ಪಂಚನಿಷ್ಠೆ ಯಾರಿಗೂ ಇಲ್ಲವಾಗಿದೆ. ಆಪರೇಷನ್ ಕಮಲದ ಮೂಲಕ ಪ್ರಜಾತಂತ್ರ ಮತ್ತು ಮೌಲ್ಯಾಧಾರಿತ ರಾಜಕಾರಣವನ್ನು ಬಿಜೆಪಿ ಕಗ್ಗೊಲೆ ಮಾಡಿದೆ. ಇದೀಗ ಯಾವುದೇ ಫಲಾಪೇಕ್ಷೆ ಇಲ್ಲದೆ ರೆಸಾರ್ಟ್ ಸಂಸ್ಖೃತಿ ಮತ್ತು ಪರಸ್ಪರ ಕೆಸರೆರಚಾಟದಲ್ಲೇ ಐದು ವರ್ಷ ಮುಗಿಸಿದೆ. ಇದೇ ಮುಜುಗರದಲ್ಲಿ ಪಕ್ಷದ ರಾಷ್ಟ್ರೀಯ ನಾಯಕರು ರಾಜ್ಯದಲ್ಲಿ ಚುನಾವಣಾ ಪ್ರಚಾರಕ್ಕೆ ಆಗಮಿಸುತ್ತಿಲ್ಲ ಎಂದು ತಿಳಿಸಿದರು.
ಯಾವುದೇ ಪ್ರತಿಫಲಾಪೇಕ್ಷೆ ಇಲ್ಲದೆ ತಾನು ಬಿಜೆಪಿ ತೊರೆದು ಕಾಂಗ್ರೆಸ್ ಸೇರಿರುವುದಾಗಿ ಚಿತ್ತರಂಜನ್ ದಾಸ್ ಹೆಗ್ಡೆ ಸ್ಪಷ್ಟಪಡಿಸಿದರು.
ಮಹಾರಾಷ್ಟ್ರದ ವಿಲೆಪಾರ್ಲೆ ಕ್ಷೇತ್ರದ ಶಾಸಕ ಕೃಷ್ಣ ಹೆಗ್ಡೆ, ಪಕ್ಷದ ನಾಯಕರಾದ ಪಿ.ಲಕ್ಷ್ಮಣ ಶೆಣೈ, ಯತೀಶ್ ಕರ್ಕೇರ, ಮೀನಾಕ್ಷಿ ಮಾಧವ ಬನ್ನಂಜೆ, ಬಿರ್ತಿ ರಾಜೇಶ್ ಶೆಟ್ಟಿ, ಅಮೃತ್ ಶೆಣೈ, ಗಣೇಶ್ ನೆರ್ಗಿ, ದಿವಾಕರ ಕುಂದರ್, ಪ್ರತಾಪ್ ಹೆಗ್ಡೆ ಮೊದಲಾದವರು ಪತ್ರಿಕಾಗೋಷ್ಟಿಯಲ್ಲಿ ಉಪಸ್ಥಿತರಿದ್ದರು.
