udupibits

ಉಡುಪಿ: ಇತ್ತೀಚೆಗೆ ಹುಬ್ಬಳ್ಳಿ ಮತ್ತು ಬೆಂಗಳೂರಿನಲ್ಲಿ ಪೋಲೀಸರಿಂದ ಬಂಧಿತರಾದ ಶಂಕಿತ ಉಗ್ರರು ಉಗ್ರರೇ ಆಗಿದ್ದಲ್ಲಿ ಈ ಬಗ್ಗೆ ನಿಷ್ಪಕ್ಷಪಾತ ವಿಚಾರಣೆ ನಡೆದು ಶಿಕ್ಷೆಯಾಗಲೇಬೇಕು. ಆದರೆ ನಿಷ್ಪಕ್ಷಪಾತ ತನಿಖೆ ನಡೆಯಬೇಕಾದರೆ ದಕ್ಷ ಹಾಗೂ ಜಾತ್ಯಾತೀತ ಪೋಲೀಸ್ ಅಧಿಕಾರಿಗಳು ನೇಮಕವಾಗಬೇಕು. ಶಂಕಿತ ಉಗ್ರರ ಆರೋಪಿತ ಉದ್ಧೇಶಗಳು ಮತ್ತು ಹಿನ್ನೆಲೆಯ ಬಗ್ಗೆ ಯಾವುದೇ ಖಚಿತ ಮಾಹಿತಿ ದೊರಕುವ ಮೊದಲೇ ಇಡೀ ಮುಸ್ಲೀಮ್ ಸಮುದಾಯದ ಮೇಲೆಯೇ ಅನುಮಾನವನ್ನು ಹುಟ್ಟುಹಾಕುವ ರೀತಿಯಲ್ಲಿ ಬಹುದೊಡ್ಡ ಮಾಧ್ಯಮ ವಿಭಾಗ ಸತತವಾಗಿ ವರದಿಗಳನ್ನು ಪ್ರಕಟಿಸುತ್ತಿರುವುದು ಹಾಗೂ ಶಂಕಿತ ಉಗ್ರರನ್ನು ನೇರವಾಗಿ ‘ಉಗ್ರರು’ ಎಂದು ಬಿಂಬಿಸುತ್ತಿರುವುದು ಮಾತ್ರ ಅತ್ಯಂತ ಆತಂಕಕಾರಿ, ಕಳವಳಕಾರಿ, ಖಂಡನಾರ್ಹ ಮತ್ತು ಆಕ್ಷೇಪಾರ್ಹ ಎಂದು ಕರ್ನಾಟಕ ಕೋಮು ಸೌಹಾರ್ದ ವೇದಿಕೆಯ ಉಡುಪಿ ಜಿಲ್ಲಾಧ್ಯಕ್ಷ, ಖ್ಯಾತ ಚಿಂತಕ ಜಿ.ರಾಜಶೇಖರ್ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಕೋಮು ಸೌಹಾರ್ದ ವೇದಿಕೆಯ ಉಡುಪಿ ಮತ್ತು ದಕ್ಷಿಣ ಕನ್ನಡ ಜಿಲ್ಲಾ ಘಟಕಗಳು ಜಂಟಿಯಾಗಿ ಇಂದು ಬೆಳಗ್ಗೆ ಉಡುಪಿ ಪ್ರೆಸ್ ಕ್ಲಬ್ ನಲ್ಲಿ ನಡೆಸಿದ ಮಾಧ್ಯಮಗೋಷ್ಟಿಯಲ್ಲಿ ಅವರು ಮಾತನಾಡುತ್ತಿದ್ದರು. ಪ್ರಕರಣದ ನಿಷ್ಪಕ್ಷಪಾತ ತನಿಖೆ ನಡೆಯದ ರೀತಿಯಲ್ಲಿ ಪೋಲೀಸರು ಹಾಗೂ ಗುಪ್ತಚರ ಇಲಾಖೆಯವರು ಆಯ್ದ ಮಾಹಿತಿಗಳನ್ನು ಸೋರಿ ಬಿಡುತ್ತಿರುವುದನ್ನು ಮತ್ತು ಅವುಗಳನ್ನು ಕೆಲವು ಅಕ್ಷರ- ದೃಶ್ಯ ಮಾಧ್ಯಮಗಳು ಅತಿರಂಜಿತವಾಗಿ ವರದಿ ಮಾಡುತ್ತಾ ನ್ಯಾಯ ಪ್ರಕ್ರಿಯೆಗೇ ತೊಡರುಗಾಲಾಗುತ್ತಿದೆ ಎಂದು ರಾಜಶೇಖರ್ ಟೀಕಿಸಿದರು. ಬಂಧಿತರ ವಿಚಾರಣೆ ನಡೆದು ನ್ಯಾಯಾಲಯದಲ್ಲಿ ಅವರು ಅಪರಾಧಿಗಳು ಎಂಬ ತೀರ್ಮಾನ ಪ್ರಕಟವಾಗುವವರೆಗೂ ಅವರು ನಿರಪರಾಧಿಗಳು ಎಂದೇ ಪರಿಗಣಿಸಬೇಕು ಎಂಬುದು ಕ್ರಿಮಿನಲ್ ಕಾಯ್ದೆಯ ಮೂಲಭೂತ ನಿರ್ದೇಶಕ ಸೂತ್ರವಾಗಿದೆ. ಸಾವಿರ ಅಪರಾಧಿಗಳು ತಪ್ಪಿಸಿಕೊಂಡರೂ ಒಬ್ಬ ನಿರಪರಾಧಿಗೆ ಶಿಕ್ಷೆಯಾಗಬಾರದೆಂಬುದು ಈ ದೇಶದ ಪ್ರಜಾತಂತ್ರದ ನ್ಯಾಯಸಂಹಿತೆಯ ಮೂಲ ಸೂತ್ರವಾಗಿದೆ. ಆದರೆ, ಈವರೆಗೂ ಈ ‘ಶಂಕಿತ ಉಗ್ರ’ ರ ಪ್ರಕರಣದಲ್ಲಿ ಮಾತ್ರ ಈ ಬಗೆಯ ಯಾವುದೇ ನ್ಯಾಯ ಸಂಹಿತೆ ಅನ್ವಯವಾಗದಂತೆ ವಿಚಾರಣೆ ಮತ್ತು ತನಿಖೆಗೆ ಮುನ್ನವೇ ಮಾಧ್ಯಮಗಳ ಕೋರ್ಟಿನಲ್ಲಿ ತೀರ್ಪುಗಳು ಪ್ರಕಟವಾಗುತ್ತಿವೆ ಎಂದು ಟೀಕಿಸಿದ ರಾಜಶೇಖರ್, ನಮ್ಮ ಅತ್ಯಂತ ಭ್ರಷ್ಟ ರಾಜಕಾರಣಿಗಳು ಕೂಡಾ ನ್ಯಾಯಾಲಯ ತಮ್ಮನ್ನು ಅಪರಾಧಿ ಎಂದು ನ್ಯಾಯಾಲಯ ತೀರ್ಮಾನಿಸುವವರೆಗೂ ತಾವು ನಿರಪರಾಧಿಗಳು ಎಂದು ಹೇಳಿಕೊಂಡು ಅಧಿಕಾರದಲ್ಲಿ ಮುಂದುವರಿಯುತ್ತಿರುವಾಗ, ಶಂಕಿತ ಉಗ್ರರಿಗೂ ಅದೇ ನ್ಯಾಯ ಸಂಹಿತೆ ಅನ್ವಯವಾಗಬೇಕೆಂದು ಪ್ರತಿಪಾದಿಸಿದರು.
ಈ ಹಿಂದೆ 2007-08 ರ ಚುನಾವಣೆಯ ಸಂದರ್ಭದಲ್ಲೂ ನೂರಾರು ಮುಸ್ಲೀಮರನ್ನು ಉಗ್ರರ ಹೆಸರಲ್ಲಿ ಹುಬ್ಬಳ್ಳಿ ಕೋರ್ಟ್ ಸ್ಪೋಟ, ಮಾಲೆಗಾಂವ್, ನಾಂದೇಡ್ ಬಾಂಬ್ ಬ್ಲಾಸ್ಟ್ ಇತ್ಯಾದಿ ಪ್ರಕರಣಗಳಲ್ಲಿ ಬಂಧಿಸಲಾಗಿತ್ತು. ಆಗಲೂ ಕೆಲವು ಮಾಧ್ಯಮಗಳು ಬಹಳ ವ್ಯವಸ್ಥಿತವಾಗಿ ಇಡೀ ಮುಸ್ಲೀಮ್ ಸಮುದಾಯದ ಮೇಲೆಯೇ ಚಾರ್ಜ್ ಶೀಟ್ ಹಾಕುವಂ ರೀತಿಯಲ್ಲಿ ವರದಿಗಳನ್ನು ಪ್ರಕಟಿಸಿದವು. ಆದರೆ, ಆ ಎಲ್ಲಾ ಪ್ರಕರಣಗಳಲ್ಲೂ ಯಾವ ಮುಸ್ಲೀಮರೂ ಭಾಗವಹಿಸಿರಲಿಲ್ಲ ಎಂಬುದು ಬಳಿಕ ಸ್ಪಷ್ಟವಾಗಿ ಸಾಬೀತಾಯಿತು. ಪೋಲೀಸರ, ಕೋಮುವಾದಿ ಸರಕಾರದ, ಕೆಲವು ಮಾಧ್ಯಮಗಳ ಬೇಜವಬ್ದಾರಿ ಮತ್ತು ಸ್ಥಾಪಿತ ಹಿತಾಸಕ್ತಿಗಳಿಗೆ ಬಲಿಯಾಗಿ ನೂರಾರು ಮುಸ್ಲೀಮರು ವಿನಾಕಾರಣ ಅವಮಾನ ಮತ್ತು ಶಿಕ್ಷೆಯನ್ನು ಅನುಭವಿಸಿದರು. ಇಷ್ಟಾದ ಮೇಲೆಯೂ ಮೊದಲು ‘ಉಗ್ರರು’ ಎಂದು ಬರೆದ ಮಾದ್ಯಮಗಳು ಕನಿಷ್ಟ ಕ್ಷಮೆಯನ್ನೂ ಯಾಚಿಸಲಿಲ್ಲ ಎಂದು ರಾಜಶೇಖರ್ ಖೇದ ವ್ಯಕ್ತಪಡಿಸಿದರು.
ಅಂತರಾಷ್ಟ್ರೀಯ ಮಟ್ಟದಲ್ಲಿ ಆಸ್ಟ್ರೇಲಿಯಾದ ಡಾ.ಮುಹಮ್ಮದ್ ಹನೀಫ್ ಪ್ರಕರಣವನ್ನೂ, ರಾಷ್ಟ್ರ ಮಟ್ಟದಲ್ಲಿ ಪಾರ್ಲಿಮೆಂಟ್ ಪ್ರಕರಣವನ್ನು ರಾಜಶೇಖರ್ ಉದಾಹರಿಸಿದರು. ಭಯೋತ್ಪಾದನಾ ಪ್ರಕರಣದಡಿಯಲ್ಲಿ ಡಾ.ಹನೀಫ್ ರನ್ನು ಬಂಧಿಸಿದ ಆಸ್ಟ್ರೇಲಿಯಾ ಪೋಲಿಸರು, ಬಳಿಕ ನಿರಪರಾಧಿ ಎಂದು ಅವರನ್ನು ಬಿಡುಗಡೆಗೊಳಿಸಿತು. ಆಗ ಅಲ್ಲಿನ ಸರಕಾರ ಡಾ.ಹನೀಫ್ ರಿಗೆ ಹರಿಹಾರ ನೀಡಿತು. ಪಾರ್ಲಿಮೆಂಟ್ ದಾಳಿ ಪ್ರಕರಣದಲ್ಲಿ ಎಸ್.ಎ.ಆರ್.ಗಿಲಾನಿ ಹಾಗೂ ಇಫ್ತಿಕಾರ್ ಗಿಲಾನಿಯವರನ್ನು ಬಂಧಿಸಿ ಬಳಿಕ ಬಿಡುಗಡೆಗೊಳಿಸಿತು ಎಂದು ರಾಜಶೇಖರ್ ನೆನಪು ಮಾಡಿಕೊಂಡರು.
ಪೋಲೀಸರು ಹಾಕುವ ಚಾರ್ಜ್ ಶೀಟ್ ಗಳನ್ನು ಕೋರ್ಟ್ ಗಳು ಖುಲಾಸೆಗೊಳಿಸಬಹುದು. ಆದರೆ, ಮಾಧ್ಯಮಗಳು ಹಾಕುವ ಚಾರ್ಜ್ ಶೀಟ್ ಗಳು ಜನಮಾನಸದಲ್ಲಿ ಉಳಿದು ಸಮಾಜದಲ್ಲಿ ಅಲ್ಪಸಂಖ್ಯಾತರ ಬದುಕನ್ನು ಅಸಹನೀಯಗೊಳಿಸುತ್ತದೆ. ಆದ್ದರಿಂದ, ಹಳೆಯ ಅನುಭವದ ಹಿನ್ನೆಲೆಯಲ್ಲಿ ಮಾಧ್ಯಮಗಳು ಪ್ರಕರಣದ ವರದಿ ಮಾಡುವಾಗ ಆರೋಪಿಗಳು ನಿರಪರಾಧಿಗಳಾಗುವ ಸಾಧ್ಯತೆಗಳನ್ನು ಗಮನದಲ್ಲಿಟ್ಟುಕೊಳ್ಳಬೇಕು. ಮಾತ್ರವಲ್ಲ, ಕೆಲವು ವ್ಯಕ್ತಿಗಳು ಮಾಡಿರಬಹುದಾದ ತಪ್ಪಿಗೆ ಇಡೀ ಸಮುದಾಯದ ಮೇಲೆ ಹೇರುವ ಪ್ರಮಾದವನ್ನು ಮಾಡಬಾರದೆಂದು ವಿನಂತಿಸಿದರು.
ಆಯ್ದ ಮಾಹಿತಿಗಳನ್ನು ಸೋರಿಬಿಡದಂತೆ ಪೋಲೀಸರಿಗೆ ಕಟ್ಟುನಿಟ್ಟಿನ ಸೂಚನೆ
ನೀಡಬೇಕೆಂದೂ, ಕೋಮುವಾದಿ ಶಕ್ತಿಗಳ ಅಜೆಂಡಾಗಳಿಗೆ ಪೂರಕವಾಗಿ ಪ್ರಕರಣವು ಬಳಕೆಯಾಗದಂತೆ ನೋಡಿಕೊಳ್ಳಬೇಕೆಂದು ಪೋಲೀಸ್ ಮುಖ್ಯಸ್ಥರಿಗೆ ಮನವಿ ಮಾಡಿದ ರಾಜಶೇಖರ್, ಈವರೆಗೆ ತನಗೆ ಹತ್ತಿದ್ದ ಎಲ್ಲಾ ಜನವಿರೋಧಿ ಕಳಂಕದಿಂದ ಮುಕ್ತವಾಗುವ ಹುನ್ನಾರದಲ್ಲಿ ರಾಜ್ಯದ ಬಿಜೆಪಿ ಸರಕಾರ ತೊಡಗಿದೆ ಎಂದು ಆರೋಪಿಸಿದರು.
ಮಾಧ್ಯಮಗೋಷ್ಟಿಯಲ್ಲಿ ಕರ್ನಾಟಕ ಕೋಮು ಸೌಹಾರ್ದ ವೇದಿಕೆಯ ದ.ಕ.ಜಿಲ್ಲಾ ಘಟಕದ ಅಧ್ಯಕ್ಷ ಸುರೇಶ್ ಭಟ್ ಬಾಕ್ರಬೈಲು, ಕಾರ್ಯದರ್ಶಿ ಮುಹಮ್ಮದ್ ಕಕ್ಕಿಂಜೆ, ಉಡುಪಿ ಜಿಲ್ಲಾ ಉಪಾಧ್ಯಕ್ಷರುಗಳಾದ ಖತೀಬ್ ಅಬ್ದುಲ್ ರಶೀದ್, ಲೂವಿಸ್ ಲೋಬೋ ಹಾಗೂ ಜತೆ ಕಾರ್ಯದರ್ಶಿ ಹುಸೇನ್ ಕೋಡಿಬೆಂಗ್ರೆ ಉಪಸ್ಥಿತರಿದ್ದರು.